قصيد
سمّ و سرج يا فارس اللطام
عبد الرشيد الجزائري-مارس\أبريل 2019
سمّ و سرّج يا فارس اللْطام---للجزائر خف روح يا خليلي
يوم تنين وعشرين بالتمام--- خرجت حشود بالعلام تشالي
من الشمال و من عين ڨزام---من الصحراء و من هو تلّي
من الشاوية بلاد الكرام---و الهضبة ناس سطيف العالي
من عنابة و زيد القدام--- أرض كتامة سكيكدة و اجلجلي
و من بجاية يجيكم السلام---و من تيزي و كل حر قبايلي
و البهجة سكني على الدوام---أمرق لشڨ الغرب، لشرشالي
المهم عدّهم كلهم بالتمام---و لا تنس مدن الغرب يا ويلي
وهران دار الشّحمي و الضرغام---تلمسان مدينة الفقيه المغيلي
هوّد للفرسان أصحاب الخيام---العود و البارود أولاد النايلي
لِتْنَبيه من الجمْاعة بالكْلام---عيدْ مْنين انْتَ تْرى نْسَبْ لي؟
يْواجْبَك يقول ليك :أنْعام---أنا ناس الجزائر كلهم أهلي
فيهم شيوخ و مرضى بالكمام---مشاواعَقْبة، حْدور و سْكالي
زيد عجايز بالحايك و اللثام---نوات كْنيس العصابة بالبالي
و ذيك البنية و ذاك الغلام---هما للحراك كِما للتّاج اللآلي
تلا قيك سرايا من الريام---مطلية بذيك المساحيق الغوالي
خرجت بالجمعة لابسة العلام---تمشي على رْسَلْها لا تْبالي
الحالة تظهر آمنة ذي لِيَّام---رحمة نازلة من الله العالي
رايحة للبريد هذي الأقوام---سرجت على خيار خيلي
يمكن في الباص لا الطرام---و لاّ سيارة رونو و شفرولي
الناس ما طاب ليها منام---ساهرة تفكر طول الليالي
تشوف الظلم يسري كالظلام---راهي الناس مغبونة يا أبطالي
تشوف نهيب المال العام---على يد أحمد، رضا و علي
بالخامسة الموس لحق للّعظام---ثار من قالوا طفى ما يلالي
لحق صوت من تحت الرخام---يوَصّيهم على الحرية و الإستقلالِ
قررنا حزب فرنسا علينا حرام---خفّوا روحوا
علينا ڨاع يا فلولِ
القدوة شهيد وصْحابو كرام---و عالم، باديس، بشير والميلي
ما نرضى العنف ونفشوا السلام---ولكن معاداتنا سومها غالي
ما نرضى ذل ما نرضى ضيام---ذْكَرْنا سيدنا النّبي عليه صلّ
حنا أهل البرنوس و بوسلهام---أهل الصوف إذا بغيت سْوالي
نوينا من الجذر نغيّر النظام---الخاين يصَفْ على يْمين و شِمال
ها الأمّة خلّوها تفوت للقدّام---سبقتنا أمم و خلاّتنا فالتّالي
ما نَفْتْرَقْ ديننا والتاريخ لْحام---يا ما فْقيهْ في التاريخ و الأحوالِ
شاتيين قطع السرّة يا قوام---الوصي بعيد و الصديق تْوالي
جيبوا القوّة و القائد الهمام---و زيد اشكِيوْا لابْليس و الدّجّالِ
تْحَل الصندوق و طار لَحْمام---الفنيق حْيَ و طار في العلالي
