زاكو

زاكو

يا مولانا يا كريم يا ذا الشان العظيم

قلوبنا راهي في تسليم وصفات النية

على عرشك في تحكيم راك يا ربي يا عليم

فرغ صبرك في تعميم تطفي دا الكية

هناك راهي العجوز برضاك طامعة تفوز

فكلها للصبر الرموز، راهي النار مقدية

راح عليها الطير لكان رافد و يسير

غطا النمر وفير يدفيها في الشتوية

مقامه مع الخليل، للقرآن في ترتيل

و الجماعة في تهليل في السماء العلوية

الحديث على الصغير، لكلامو ديما كبير

السيد مولى تدبير، وسميته زكريا

في قامته جد عماري، و في الفهامة خير من الذراري

في البشرة هو خمري و عينيه شابة سحرية

نثبت يم ازداد،نقلت الوالدة في تعداد

حطت هناك في الميعاد، في العيادة اللوطانية

ديار البابور، عام واحد و تسعين المشهور

في أفريل رابع الشهور، قبل الإنتخابات التشريعية

أول خرجة كانت ليه، في يدي ماسك فيه

في السخانة نبحري عليه، في الحوينتة العائلية

كانت الطفل به ولعة، على الشطيح مرمي يسعى

كان يتلوى كاللفعى، خصته غير الزرناجية

ليها كان دواه الكف، بطل الرقصة و الدف

بعدما قلنا والف، و انس وقع التوشية

لما دخلت مماه الدار ، رحب بها في تكرار

داير عليها في إصرار، و يغدق عليها يالهدية

ما ننساش لما يلاقيني، و في المطار يودعني

صورته ديما في عبوني يوم نا خد الهندية

كان يحب نرفد في يدي، و يشت صح التين الهندي

يشوف التيلي ديما عندي، يشتي يجيب الصبحية

خدم معي أرض الدوش، و لعب إيه بأدوات النقوش

يتفرعن على خاوتو يفشوش و يقلد كلام الحجية

و فجأة ظهرت خوية مرضة كانت لينا كوية

تحسسناها عبر الرؤية، ورمة ميديلوبلآستومبة

شافت أمه في منامها من قبل ما جرى لها

تلت بيضات من ديالها، انكسرت فيهم المسكية

وحنا غديك في سفر، زاد الحل و تعسر

مشى المرض و انتصر، و لزمت في الحين العملية

بقى في المستشفى شهرين بين الدواوي و الأنين

و الحاجة معه قاب قوسين، تعبت حالتها النفسية

بعدها الكل تنفس، الصبي تحرر من الحبس

و الأحباب به تعرس، خرج من الضر بالوقفية

و ابداوه بدواء اللبناني وكل حبوبة زادوا ثاني

كلهم الصبي و الشباني، يقووله الدم في الأوعية

ولما ارجعت للجزائر، استقبلني و أنا حاير

فيه وقي حالته كداير، خارج المطار مع الجمعية

مر الوقت وانتكس، قلنا العشبة تيبس

لكن بربي تنفس و رجعنا للحالة العادية

كانت الناس تجي تزور و في عقولها صورة القبور

سخابلهم عليه الدور و كل من خطورة الوضغية

كان ليه مع الكيميوترابي و خالنها الراديوترابي

قعود حتى مل أصاحبي بدون فايدة و لا نفعية

لحصيلو راح وجاء زمان و رجعت لبعيدة البلدان

كان ساعتها نعسان هو و خاوتو في الصبحية

بقينا نترقب من بعيد، أخبار على صحته تفيد

حبس في العام الجديد و راحت القوة الحركية

تعبوا معاه هناك كثير،يتوجع وما يقدر يسير

و اللخر سكي الهدير و اطفات الشعلة النورية

يظهر لي المولى قال، يسترد واحد من الأشبال

في حين بنتين في إقبال، حظه كثنين من النسوية

نشكر الخوة العرب من العراق و سد مأرب

على وقوفهم معي بالجنب قراءتهم يس و التعزية

كانت هذه قصة زاكو لعليه الكبار مازال يبكوا

في شعر ناوي عمه يتركه للذكرى بصمة تاريخية

دلهي 1998

عبد الرشيد الجزائري